Bahat din ho gaye the unhe uss restaurant main gaye hue. Bahat din ho gaye the unhe bina ek khalish ke koi baat kiye hue. Bahat din ho gaye the unhe sirf baate kare hue. Udate udate khayalon ko apne shabdon main bandhate hue. Bahat din...
Uss din raasta uss restaurant ka kuch kum sa lag raha tha. Unke hoton se khilkhilati hasi ne shayad unke kadmon ki raftar badha di thi. Restaurant pohache toh dekha ki andar bahat hi kum log behte hain. Ladke ne ladki ki taraf dekha aur muskuraya. Uss se shor pasand nahi tha. Yeh restaurant bhi kuch aaisa hi tha. Ek mohabbat ke maare shayar ki taraf. Jisko koi shor duniya ka sunai nahi deta. Woh toh bas apni hi kavitaon main mast rehta hai.
Woh dono kone ki ek table par jakar beth gaye. Kursi nahi thi chota sa sofa tha bethane ki liye uss table par. Ladki toh bade maze main pairon ko upar kiye uspar viraj gayi. Magar ladke se itni door apni mehboob se betha na gaya. Woh utha aur usne apna chota sofa hilakar uske pass lane ki koshish ki. Utane main chup chap aa kar ek waiter wahan khada ho gaya. Ladke ne uski oor dekha aur halka sa jhep gaya. Ladki magar zara bold tarike ki thi. Usse bhi uske baju main hi bethane ki jidd thi. Usne waier se pucha, "Hum isse yahan nahi rakh sakte?". Waiter ne muskura kar sar hila diya. Utane main uska boss bada waiter aa gaya. Usne pucha kya baat hai aur ladki ne bataya. Fir uss bade waiter ne dusare table se kursi ki taraf hi dikhane wali kursi lakar uss ladki ke chote sofa ke pass rakh di. Finally, Ladka wahan beth gaya. Bas fir kya tha. Ladki ne apni baaton ki fuljhadi jalayi aur uski chatakti matakit baaton ki roshni main woh dono kho gaye. Magar ladke ko lag rahi thi tez book. Ladki kuch bol rahi thi jab usne uski aankhon main ek bechani dekhi. Woh samjh gayi, ki bhaiya aab toh jo hai bina khaan paan kaam chalega nahi. Usne jhat se menu uthaya aur ladke se pucha, "Rajasthani Bhindi try karoge"? Ladka zara hichkichaya. Uss se ladki ki choice par pura bharosa tha, magar rajastani bhindi??? Nashate main??? Uski soch ke thode bahar hi thi yeh baat. Magar uss se nayi cheezen try karna bada aacha lagta tha. Kuch naya, kuch anokha. Uss se zindagi ko mauka dena bahat aacha lagta tha. Aakhir usse woh ladki bhi toh aase hi mili thi. Zindagi ke ek mood par. Jahan uske paas jane ka ki koi khaas wajah nahi thi. Usne tabhi ek chance liya tha. Usne aaj fir ek chance liya. Woh muskuraya aur ladki ne jhat se order kar diya.
Rajasthani bhindi aayi aur ussi ke saath unn dono ki favoirate hot apple buttered tea. Ladke ko rajhasthani bhindi bahat pasand aayi. Usne khush hokar ladki se kaha, "Tum na hoti toh main yeh kabhi order nahi karta. Sochta bhi nahi iske baare main". Ladki muskurayi aur jawab diya, "Tum na hote toh main kabhi inhe try karne ki nahi sochati. Tum mujhe mere mann ki sunane dete ho". "Aacha magar kaise? Tum hamesha apne mann ki nahi karti?" "Nahi. Sabke saath nahi. Agar aur koi hota toh main bhi ek safe bet main kuch pehle khaya hua, jana pehchana order karti. Tumhare saath mujhe galti karne main darr nahi lagta". "Aur tumhare saath mujhe zindagi jeene main. Main bhi nayi cheezen tumhare saath hi try karta hun. Warna kuch galat ho jaye toh sab bahat bolte hain". Woh dono ek dusare ko dekhkar muskuraye.
Fir unn dono ne baaton ke diye jalaye. kahin khwabon ki lau thi, kahin soch ki aur tel daala usme khoob saari hasi ka. Hot apple buttered tea peete hue kai armon main unhone jaan phunki. Kuch apni aankhon main, kuch ek dusare ki. Uss restaurant ki bheeni peeli light main unhone ek dusare ka haath thama. Fir ek baar ek pal unhone apni yaadon main bandha. Inhi palon ke dhaage bana rahe the woh. Hamesha jude rehne ke liye.
